I hackl wia deppat und es schaut nix ausse, weu da Sii Eii Ee aunscheinend wia deppad hacklt damid jo nix ausseschaud bei meine Oaweid. De woin jo ned (zum Beispue) das ana, dea se zu recht Missionleita und Woedreisenda nend, iagnwoeche klassifiziade Infoamationen zu de Nega bringd. Deswegn schauns dase easchdns kane klassifiziadn infoamationen kriag, und zweitns dasima meine Missionreisn ned leistn kau, unglaubliche Gschichtn, sogi eich. Owa, natialich leani a fue iwan Sii Eii Ee auf dee Oat, und wissds wosi gleand hob? Jedsd hoid's eich de Oawaschln au: Da Sii Eii Ee waas nedamoi wo es Schweizahaus is!! Jo, richtig hobds glesn, da Sii Eii Ee waas ned wo es Schweizahaus is. Najo, z'eascht howimi natialich gfreid, wiari des g`head hob, owa nocha bini draufkumma warum des so is: weu I soewa ned was, wo des Schweizahaus is, und da Sii Eii Ee seit 13 Joa und 8 Monad nua mea aun mia umadumschpioniad. Des hasd - mid dem Kuazzeidgedechtnis des Sii Eii Ee : wos I ned waas, mochd den Sii Eii Ee ned haas.
Nochdem I auf des ois draufkumma bin, howi auf amoi de Woed vue bessa faschtaundn. Jeds wasi zum Beispue, warum I sofue Weabematerial ins Haus griag: weu de Fiamen wissn dasis ned les, gem se geheime Infoamationen fian Sie Eii Ee eine in de Reklame-blahdln, weu - waun's a I ned les - da Sie Eii Ee lesds sicha, waun's nua mia g'head oda in mein Zimma umadumligd. Aussadem wasi jedsd, warum's in den Schtaatn kan anon-soeava gibd. Weu da Sie Eii Ee gwussd hod, dasi den fawendn dad. Najo, do haumsasi eigentlich ee a Eigndoa gschossn, da Sie Eii Ee, weu jedsd haumsas natialich nau schlechta, weu meine meels de Schtaatn goa ned segn, befoa se scho kodiat und anonymisiad san. Wos glaubd's wia da Sie Eii Ee se eagan dad, wauni a Gruppn alt.culture.anon.penet.fi gruendn dad? Ha, des wad leiwaund! De Idee isma jedsd easchd kumma, owa se gfoid ma. Najo, und drittns isma jedsd kloa warum de gaunze Woed glaubd, dass kane gruenen Marsmaennchen gibd: weu I soewa ned aun de gruenen Maasmaennchen glaub, glaubd da Sie Eii Ee nadialich aa ned draun, oda glaubd zumindest, das jede dementschbrechende Infoamation fo mia feanghoidn wean muas, und zensuriad jedn Zeidungsadikl dea UFOs oda LGMs (little green men) eawehnd. Des weari dem Sie Eii Ee uebrigens nie fazeihn, weuma do letztns wos beinliches basiad is: I hob in Juhtah (wo de UFOs aungeblich laundn, weu duat sofue Leid wohnan de nix aundas zduan hau ois aun de UFOs z`glaum, und de LGMs nadialich nua duat hifliagn wo ma a aun se gleubd) an Foatrog g'hoidn "De kosmischn Strings und de Muetologie dea Hopi Indiana", dea natialich - wia a jeda helle Wiena glei eakennd - fo fuan bis hintn a anzige Irrefuearung dea Behoeadn woa. Owa, mei Mission gaunz eansd gnumma, howi ole meglichn Refarenzn und Kweafaweise gmocht auf Weata woima docht hob, de kend kana. Daun hodmi ana gfrogd, wia des olas midn LGM Effekt zaumhengd. I hob nadialich ned gwussd, wos LGMs san (weu da Sie Eii Ee de entschbrechendn Infoamationen fo mia feanhoit), hobma woin nix aumeakn lossn, und hob iagnd an Schaas dazoed, das mei Deorie foischdendig mid dea fo de LGMs iwaeinschdimmt. Na kint's Eich foaschtoen wiasi de Moamonen und de aundan Eiwohna fu Juhtah ooghaud haum, de jedn Dog glaum se segn wia debil de LGMs san. De haum des wiaklich lustich gfundn, dasi und de LGMs se einig san. Najo, howima docht, des beschtetigd wida, dasi in ana Woed, wo ned iwaroi weanarisch gschbrochn wiad, ned daham bin. Oiso, liaba Sie Eii Ee, hobds eich wida a Eigndoa gschossn, weu I jedsd wida in mein Missionseifa beschtetigd bin.
P.S.: aun de Eascheinungen fo unsam Keisa, de da sea g'eate Hea Fuasitzende ealebd, aun de glauwi natialich scho.
yours, Sgt. Blumenkraft
Mon, 23 May 1994 10:25:49 UTC, Sgt. Blumenkraft