Haudi so wia "Gaudi", nua mit "H", wia "Hawara".
So. Do bin i wieda amoi. Wos damma heit? Jessas, mia gengan laungsaum de Schmeh aus! --- Aaajo! Foid ma doch no wos ei.
Do warad ma wieda bei de Viecha, oba ned bei de Vogerln, sondan bei de Seugetiere. Oda eigentlich eh ned, weu ob des a Seugetier is, waass jo kana so gnau ned. Des is nemlich a gaunds a komisches Tier, is rechd scheu, a bissl gschamig, wia ma so sogd, weu waunsd drauf aufbassd, dassd ans darwischd, daun kummd kans. Dabei is ned amoi so soetn, des liabe Viecherl, es is doch weita verbreited, ois ma aunnemma ded.
Naaa, jeds seids oba scho neigirich, wos? I wue Eich a nimma laenga auf de Foita schbaunna, des Viech, vo dem i Eich heit dadsoehn wue, is des Rieh.
Nigs wissn, no nia ghead? Des hob i ma so vuagschdoed.
Beheimated is des Rieh brindsipioe, glaub i, im gesaumtn deitschn Schbrochraum. Konkrete Sichtungen hods scho in da Tullna Gegend gebm, aa bei mia daham, im Weiviadl, sogd ma, dass scho beobochtet worn is, und sogoa do in Wean, in da Grosschdod sois daham sei. Wea waass, vielleichd gibds es aa no im Burgnlaund, oda - wos waas i - in da Schdeiamoak, oda in Beian, ka Auhnung, so weid hob i des no ned eafurschn kennan.
Eigentlich waass ma goa ned sovue vo de Riehs, vo wos sa sich ernaehrn, wia sa si fuatpflaunzn, ma siachds meisdns nua gaunds fluechdig, maunchmoi head mas aa nua, und siachds goa ned. Da erschte mia bekaunnte Nochweis vo da Eksisdends von de Riehs woa im - lossds mi schnoe nochdengn - im fuemfadochdsga Joa, vielleichd woas aa easchd im segsadochdsga Joa, so gnau waass i des nimma, is jo aa wuaschd, ned woa?
Des woa dsu ana Dseid, wiari no do in da Fiama - hoitaus, i glaub, do is jeds grod a Rieh vuabeigrennd, a klaans, waunn i mi ned teisch - oiso, i woit sogn, i hob domois a Kronik gschriebm, wos so ollas aun bedeutsaume Ereignisse bassiad is. In ana heitaren Foam, kaunn si a jeda dengn, dea wos mi kennd. Do is im konkretn Foi um de Sitsordnung vo ana Saufarei - "Arbeitsessen" sogd ma dsu sowos - oba erscht noch da Hockn, ned dass glaubds - oiso um de Sitsordnung bei so an Gschduri gaungan, beim Okdobafesd, in Muenchn woa des. Noch a boa Moss san duantn nemli soichane bedeutsaumen Ereignisse vuakemman, dass in de Kronik eine miassn haum. Do haumma am Buedschirm en Disch aufdseichnd, des miassds eich ungefeah so vuaschdoen:
X X X X
----------------------
/ /
X / / X
/ /
/ /
X / / X
/ /
----------------------
X X X X
No, und daunn is hoid bei jedn "X" higschriebm woarn, wea do gsessn is. A Kollege, da Koarl, hod augsogd, und a aundara Kollege, da Ernst dea wos bei dera Saufarei ned dabei woa, hod de Datn erfosst. Da Ernstl hod ma nemli efta beim Kronikschreibm ghoifn. Hoda oiso de Nauman higschriebm:
Dr. Sowieso, Dipl. Ing. - Ding - , Herr - woswaassi, undsoweida, de gaundsn Nauman hob i doch heit nimma im Kobf.
No, und daun woa nuamea a Blods frei, und da Ernstl hod gfrogt: "Und do, wea is do gsessn?"
Sogd da Koarl drauf: "Desbirieh"!
- Na badsch, hobds es jeds gsehng? Do is grod a kapitales Rieh vuabeigschbrunga! A Prochdeksembloa! -
Wos glaubds, hod da Ernstl higschriebm?
"Karl, das Rieh".
Hoehoe, kennds eich jeds aus, midn Rieh?
Seids sche braav, und schdoeds nigs au, wia da Hea Raedl vo Radio Dsedeh ollaweu sogd, weu sunds kummd de Bolidsei! Und bassds auf, waunn eich es negsde moi a Rieh untakummd!
Griass Eich, i wuensch Eich wos!
Haudi.
24 Jan 1995, Haudi