Haudi so wia "Gaudi", nua mit "H", wia "Hawara".
Scho laung nigs mea vo mia ghead, hmm? Warum? Des frogds no, es Gfrasda? I maan, i wü Eich jo ned olle schimpfm, oba dea wos mi varrodn hod, bei dem kennts Eich bedaunkn. Wos los woa? No eidrahd haums mi! Im Hefn bin i gsessn! Weu i jo a boa Schderndln obagschossn hob. Oba Eich kaumma jo nigs aunvatraun.
Na trotsdem, i dadsös Eich, wia des woa. Oiso, i geh in a Biachlgschäfd eine, und mecht a neiche Schdernkoartn kaffn. Grinsd de Vakeifarin so komisch und maand: "Fia wos brauchns des denn?" - sog i "weu mei oide Koartn nimma schdimmd", maand sie: "Woartns, a Momenterl" und varschwint in an Kammerl. Glei drauf kummds wieda ausse, mid dswa feine Herrn, de haum mi freindlich aungschaud, haum si links und rechts bei mia eighengd, und haum gsogd: "Wauns bitsche mitkumman". Daunn haums mi aussedsahd dsu so an Auto mid Heidlbean drauf, i hob daun hint in da Mittn sitsn deafn, de Herrn links und rechts nebm mia, und mia san scho gfoan.
Daun is de Frogarei losgaungan: Name, Vorname, Geburtsdatum, Vater, Mutter, wohnhaft, Familienstand, Einkommen und wos was i wos no ois. Peinlich woa des. Daun sogd ma dea Hawara, ich stehe im Verdacht der mutwilligen Zerstörung von Naturdenkmälern oda so wos. I hob mi nimma auskennd. Und daun sogda no, dass mi wegn Fluchtgefahr und Verdunkelungsgefahr doghoidn dedn. No, und auf amoi hob i an kweagschdraftn Bitschama aughobd, und bin scho eikastlt gwesn. Untersuchungshaft. Via Wochn, eigschbead bei Wossa und Brot. Dadswischdn hod mi efta a netter Herr interfjuud.
No und daunn woa de Vahaundlung. Kwak, heads, i sogs Eich, des woar a Kaas!
No wieda de Frogarei, a Hin und a Her hoid, wia da Hea Rädl vo Radio Dsedeh sogn ded. Daun sogd da Richta: "Angeklagter, nun erzählen Sie, was Sie am besagten Abend gemacht haben!"
Hob i gsogt: "Herr Grichd, i bin unschuidig! Da Mond is Schuid! Ea hod augfaungd ens Saufn, ea hod scho a Viadl ghobd, und i woit hoid schnölla sei ois ea, deswegn hob i daunn scho mea Viadln ghobd, i woa oiso alkoholisiert, i kaun mi aun nigs mea erinnern."
Mand da Richta: "Erstens heisse ich nicht Grichd, und zweitens können Sie das wem anderen erzählen. Sie haben nämlich" - und wachld dabei mid an Dsedl umanaund, "bereits ein Geständnis abgelegt, schriftlich, im Usenet, in der News-Gruppe soc.culture.german, unter 'wienerisch dama redn', sagt Ihnen das etwas, Angeklagter?" I woa baff. "Najo, Hea Rat, wauns eh scho ois wissn, daun brauchns mi jo nimma frogn" - "Aha. Sie gestehen also?" - "Jo, i muass jo do schdeh" sog i, "i ded mi eh liaba hinsetsn." "Nein, so habe ich das nicht gemeint", hod da Richta gsogd. "Derfi mi oiso niedasetsn?" hob i gfrogt. "Das können Sie sich ersparen", hod da Richta gsogt, "wenn Sie das Urteil erfahren, fallen Sie sowieso auf den Hintern - ähh, ich meine, dann setzen Sie sich ohnehin gleich nieder. Einstweilen können Sie noch ruhig stehenbleiben, Sie sind doch eh erst 4 Wochen gesessen!" Hahahahaha! Da gaundse Soi hod gewiehert. Trottl depata, hob i ma denkt. No und so is hoid no a gaundse Weu hin und heagaungan. Daun hod da Richta es Urteil verkündet. Do is daun aussekumman, dass i mei Schdrof eh scho oogsessn hob, und dass i jedsn haam geh derf. Daun hod da Richta no gsogd: "Merken Sie sich eins, mein Lieber: Seien Sie schön brav, und stellen Sie nichts an, weil sonst kommt die Polizei, wie Sie gemerkt haben."
Hob i no gsogt: "Hea Rat, gengans ned mid fremde Schmeh hausiern, sunst sog is en Herrn Rädl, daunn werns am Schdaumtisch beim Pühringa, beim Otto, sein Wirtn varissn, Grüch' Chi!"
Wos sogds jeds? Höhö! Ollas ned woa! Na tüpisch Haudi, a Gschichdl hoda Eich wieda einedruckd!
Nigs, Dseid hob i kane ghobd, de Hockn, wissds eh...
Jo, wos i no sogn wü: Da Woot fia de sok.kaltscha.austria is grennd, daungsche oin, de dafia gschdimmd haum. Hod mi gfreid, dass a vüle vo unsare Gostgeba do in da soc.kaltscha.dschörmen dafia gschdimmd haum. Vielleichd eh, weu i eanan scho aufn Wecka geh, doda, oba i wü kan wos untaschdön.
Oisdaunn, gnua fia heit, seids sche braav, und schdöds nigs au, wia da Hea Rädl vo Radio Dsedeh sogd, weu suns kummd de Bolidsei! Und daunn kennts leichd sei, dass ma ins Hefn kummd.
Griass Eich, i wünsch Eich wos!
Haudi.
20 Dec 1994, Haudi