Haudi so wia "Gaudi", nua mit "H", wia "Hawara".
Haaaaaaawedeeeeeeeeeeeeeeere! Wos glaubds, wos i heit dsmitoog gessn hob? A Haifischsteak! A Haifischsteak! Hobds richdig ghead! Na seawas! I maan, da Koch vo unsara Werkskuchl vawehnd uns jo mid olle meglichn kulinarischn Schmankerln. De Wochn haumma jo rechd fein gschbeisd, Sbeeea Ribs, Truudhauschnitserl, und soichane Sochn. Heit warad eigendlich a Laksfilee aum Schbeiseblan gschdaundn. Mia woitn scho unsan Koch de erschde Haubm in Aussichd schdoen, oba noch den heitign Menue is des wieda gschdrichn! Aus! Nigs! Ka Haubm! Unta soichane Umstaend ned!
Na, schee haumma gschaud! Olle haumma uns scho aufn Laks gfreid. Gemma ind Kuchl umme, schdehd dea Haifisch augschriebm. Dseaschd hob i glaubd, des is a Schmee, oba na. No, da Dscharli woa vuasichdig, dea hod si liaba de Kraudroladn gnumman, mid Baradeis Soos. Da Berni und i haum hoid den Fisch gnumma. Buelich woa des jo aa ned grod, des Dseig.
No, mia sidsn daunn so bein Disch, und dan grod Suppn leffln, haumma scho gretslt, wia des schmeckn wird. Hod da Dscharli gmaand, a Haifisch schaud scho so grauslich aus, waunna si vuaschdoed dassa sowos essn soi, daunn brauchda glei goa nigs mea dsum Essn.
Hob i gsogd, heasd oba a Foroen schaud jo aa rechd bled drei, oda a Karpfn, oda easchd a Scholle, heasd, de schaud villeichd schiach! Waun nua dea Haifisch ned so vue Gradn hod, wiara Foeroen, daunn is eh scho wos! Maand da Berni, a Hai hod goa kane Gradn, des is a Knorplfisch. Woascheinlich gibds sowos im Woidviadl, weura si so guad auskennd mid soichane Viecha, da Berni. Ea is nemlich a Woidviadla, waunnsas Eich ned dengn heds kenna.
I schau wieda auf mei Haifisch Schdikl, und hob gmerkt, dass si ned nua da Dscharli fiachd voa dem Drumm, de Kreitabutta wos draufdau haum, aa. De is nemli laungsaum obegrudschd vo den Schdikl Fisch und hod si danebm higsedsd.
No, haumma hoid dsum Schneidn augfaungd, kost i a bissl wos vo dem Haifisch. Bwaaa! Grauslich! Obscheulich, wia des gschmeckd hod! De Kreitabutta woa oba sche schoaf, so hod ma doch a bissl wos vo den Haifisch obewiagn kenna. Es Gmias dadsua hod aa noch nigs gschmeckd, und de Erdepfln woan ned goa, mid an Wuat gsogd, des Essn woa fia de Fisch!
Daunn haumma no uewalegd, wias des gebn kau, dass mia schdod an Laks an Haifisch kriagn. Haumma gmaand, den meassns soeba gfaungd haum, in da Werkskuchl. Woascheinlich woit da Koch grod en Laks beschdoen, und hod no gschwind a Schaffl Wossa in Gulli glaad. Auf amoi hod a Haiflischl ausn Gulli aussegschaud. Da Koch schnappt schnoe a Kooleffl und darschlogd en Haifisch. Daunn hodan oissa gaundsa ausn Gulli aussedsahd, und gseng, wos des fiara Drumm is, und hod si dengd, siagsd, koch ma glei den, brauch ma kan Laks beschdoen!
Uebalebd haummas jo. Sids ma noch a boa Schdund im Buero, maan i: Irgndwie druckds mi, mia liegd da Haifisch im Mogn. Sogd da Berni: Ollaweu no bessa ois umkead! Hoehoe!
Sads schee braav und schdoeds nigs au, wia da Hea Raedl vo Radio Dsedeh ollaweu sogd, weu suns kummd de Bolidsei! Odara Haifisch!
Griass Eich, i wuensch Eich wos!
Haudi.
24 Jan 1995, Haudi