Haudi so wia "Gaudi", nua mit "H", wia "Hawara".
Wissds es, wo de Wödmastan daham san? I maan de Wödmastan, ned en Wödmasta, wos es vielleichd glaubts, en Aschyl, en Happl Eanstl, den oidn Grantscheam. Naa, so grantig soi dea eh goa ned gwe'n sei, sogns, soi in Wiaglikeid a leiwaunda Hawara gwesd sei, Friede seina Sö.
Oiso, de Wödmastan: de Wödmastan in wos? Heasd Oida!
I foa jeds Joa auf Schbrochschdudium. So nebnbei damma rallifoan dsuaschaun. Do kummsd in da Wöd a bissl umanaund. Aum meistn leansd hoid bei da Semparit-Ralli, wauns wissds, wo de gfoan wiad.
Do san ma de ledsdn dswa Egskuasionen schdoak in Erinnnarung bliebn. Vua dswa Joa samma bei ana EsBeh (des hassd Sonda Brüfung, fia olle Nichdmotoaschboatfens) gwesn, dsfrua, wia si daun herausgschdöd hod. Iagnd a Bahö woa los, wos waas i... Jednfois, san do aun de hundat Leidln in da Ködn umanaund gschdaundn. Es san no schdendig wöchane dadsuakemman. I hob ma hoid des so aungschaud, und hob a bissl g'loosd, wia de Leid redn. Schdandardbegrüssung woa: "Deeere Oida!" Aha, hob i ma denkd, de haum do einheitliche Nauman, de hassn olle "Oida". A Gebildeda, a Indelella, woa a dabei! Den sei Gruss woa scho a bissl komplidsiada: "Deeeere Oida, ees schiache Hund seids aaa do!?"
Und jeda Sots, wos gsogt haum, hod mit "Heast, Oida" aungfaungt. Des erhärted jo de Deorie, dass de olle "Oida" hassn. Des warad dswoa scho a Eindrog ins Buch der Rekorde - Häufigster Vorname der Welt: Oida - oba des is no nigs wödmastaliches.
Des hob i vuarigs Joahr dalebt. Do muass i a bissl weida aushoin, sunds kennd ma si nimma aus.
Guad, a Joa schbeda, sölbe Gegnd, sölbe Dseid. Mia marschian vom Dsühl vo ana EsBeh, per Hadsch, eine, de Schdrekn entlaung. A Schdikl woa asfeudiat, daun woa Schoda. Oba des Woidschdrassl is so braad wiara Bundesschdrossn, und schbiiiisgrod! Wo soi den do a Aakschn sei? Na guad, hadsch ma weida, imma weida in Woid eine. Auf amoi mochds doch an Knik, des Schdrassl, no, schau ma no a Schdikl weida, vielleichd kummd goa no a Kuavn! (So hoamlos woa de EsBeh eh ned, des woa de Schdrekn, wo si da Willi Wiedner ausbrat hod, vo dem sein Doiota is jo nigs ibabliebn, do san de Fedsn gflogn, mei liaba...) Oiso, mia hadschn weida, kummd no a Knik, und do vuan siacht ma a an Knik, bleib ma do. Mittn in Woid, a Wiaschtlbude woa a ned weid weg.
Da NullNullNull foad voabei, najo, so foad mei Grosmuada a. Daun kummd da NullNull, des woa da Göttlicha Kuatl, da Postla, midn neichn Eskoatkossie, des woa scho a bissl scheafa. I bin auf da Aussnseitn gschdaundn, und hob scho de Bappn volla Saund ghobt. Hob i ma denkd, des wiad no wos, und hob de Schdrossnseitn gwegslt. Daun san de, wos no beim Wiaschdlschdaund ghengd san, a hea kumman, oba de haum si olle wisawi vo mia aufgschdöd, do hob i nigs ghead, wos redn. Daun san doch dswa auf mei Seitn ummekumman, de haum mi vielleichd Saund schbukn gseng, hob i ma denkd, de san indellela ois de aundan.
Und jeds kummd da Nulla. Da Haider Sepp, midn Audi EsDswaa, wissds e, des Fünfzilindadswandsigvauturbokwattrokupee. Ma hod eahm scho vo da Weidn ghead: wruuuuuumwruuuuuuuuuum (dakwea) wruuuuuUUUM WRUUUUUUU_U_U_U_U_U_U_U_U_U_M__M___M___M____M____M____KRCHHHHHHHH (bremsd) WRMMWRMM (dakwea) W_R_UU_UUU_UUU_UUU_UUU_UUU_MMMMM !!!!!! und woa scho wieda dahin. Des woa Ektschn! Do lossd di Hoosn oba! A gaundse Weu hod kana wos gsogd, de auf da aundan Seitn haum sowiso gschbukd wia de Wüdn, und haum si en Saund aus de Augn, aus de Hoa und ausn Gwaund budsd.
Nebn mia, de dswa Wödmastan haum si a wieda gfaungt, daun hod da ane des fochmennisch kommentiert: "Heasd, Oida, hosd gseng, Oida, heasd, wia da Sepp des mochd, Oida, heasd, da Haida, a Lingsbremsarl, Oida heasd, hosd gseng, Oida, und daun drahdan eine, Oida, hosd gseng wia des gehd, Oida heasd, mid an Lingsbremsarl drahtan eine, Oida, und daun gemma, heasd Oida, a Lingsbremsarl und gehd scho, Oida heasd, hosd des gseng!"
Heasd, Oida, heasd, hosd ghead, Oida, heasd, wea de Wödmastan san, Oida? Heasd, Oida, heasd, hosd du gwussd, heasd, wo de Wödmastan, Oida, heasd, de Wödmastan in "Heasd-Oida-sogn", wo de daham san? Oida, de san im Wuudkwota daham! De Wuudkwotla san Wödmasta, de duatn, wo de Ralli is, weu waun ana in an andsichn Sots DSEHNMOI "Oida" dsaumbringd, des muass a Wödmasta sei!
Desmoi woit i eich ka Gschichtl eindedruckn, des is woa, höhö! Wauns es des ned glaubds, kummds mid auffe dsua Semparidralli, im Novemba, oba dsiagsd eich woam aun, und binds eich an Schal um, dass kan Saund fressn miassds, und dass ma ned siachd, wias eich oohauds, bein Schbrochschdudian!
Und - wia sogta imma, da Hea Rädl vo Radio Dsedeh?
"Chanche braaf und chdön'Ch nigch aun, weu chunch kummd de Bolidchei. Grüch Chi!"
Griass eich, i wünsch eich wos!
Haudi.
15.11.94, Haudi